郊野及鬧市遇到蛇 應該點做?
Mar 4, 2021
喺香港郊外或市區,遇到蛇一啲都唔出奇。因為香港屬於亞熱帶地區,蛇嘅品種一啲都唔少,冬天過後發現蛇,絕對唔係奇事。根據 漁護署統計 ,香港陸地上嘅毒蛇有12至16種,其中毒性最強嘅包括金腳帶、銀腳帶,以及飯鏟頭等。
根據嘉道理農場嘅統計,每年5月至10月都常見到蛇踪。大多數蛇類其實懼怕人類,佢哋都係為咗兩餐先會現身,所以遇到蛇嘅首要態度,就係保持冷靜,唔使驚亦唔好騷擾佢。
預防被蛇咬5步曲
- 避免走入草叢密集的地方
- 避免將手或腳伸入罅隙或洞內
- 留意樹枝,因為蛇識得爬上樹木
- 戶外活動穿著長褲,以及唔好著涼鞋或拖鞋
- 避免用行山杖或樹枝去探索草叢及懷疑有蛇出沒嘅地方
延伸閱讀: 嘉道理農場《動物故事: 遇到野生蛇應怎麼辦?》
郊外遇到蛇的3個步驟
1. 保持距離
喺絕大多數情況下,蛇如果感受唔到威脅,係唔會主動攻擊人類。喺山徑見到蛇,先慢慢後退,同蛇保持2至3米左右嘅距離。此外,蛇鍾意遮蔽地方,所以盡量唔好後退去草叢樹林,留返條生路畀佢哋。
2. 眼看手勿動
蛇係有趣嘅動物,可以遠觀,但任何野生都動物其實都唔應該觸碰,萬一嚇親佢哋,或會令佢哋有異常反應。仲有就係,唔好立亂判辨蛇係有毒無毒,萬一判辨錯誤,隨時有性命之憂。
3. 不要傷害
正所謂蛇有蛇路,只要大家保持冷靜,同蛇保持一定距離,其實蛇唔會傷害人類,所以我哋絕無需要去傷害,甚至殺害蛇。如見到蛇有可能威脅其他人,可致電999報警。
鬧市遇蛇的3個步驟
如果喺鬧市發現蛇踪,香港蛇類關注組 提議大家採取以下3個方法:
- 保持鎮定,停止身體移動
- 與蛇保持3米距離,從遠處觀察
- 慢慢離開
延伸閱讀:《善待動物] 鬧市有蛇不足為奇 保持距離不要傷害》